သက်မဲ့အရုပ်တစ်ရုပ်လိုဖြစ်ခဲ့တာဘယ်လောက်ကြာမြင့်ခဲ့ပါလိမ့်။
ဒီနေ့မှ စိတ်တွေက လေးနေသလိုလို… အမှတ်တမဲ့ ပြက္ခဒိန်ကိုလှမ်းကြည့်ဖြစ်တယ်….
မေ(၃၁)

ကျွန်မ.. တစ်ခုခုကို ကြောက်ရွံနေမိသလိုလို..။ တစ်ခုခုကိုလဲ မျှော်လင့်နေမိတယ်..။ ဒီရက်ဟာ ကျွန်မတို့ နှစ်ယောက်ရဲ့ ပျောက်ဆုံးခြင်းများစွာထဲက တွေ့ဆုံခြင်းတစ်ရက်ဖြစ်တယ်..။ နှုတ်ခမ်းတွေဘာလို့ ဒီလောက်လှုပ်နေရတာလဲ..။ တကယ်ဆို အချိန်တွေအများကြီး ဖြတ်သန်းခဲ့ပြီးပြီ…။ ကျွန်မ ဒီလောက်မတူန်လှုပ်သင့်ပါဘူး။ တဆတ်ဆတ်တုန်လာတဲ့ မျက်ခမ်းတွေထဲက မျက်ရည်စတွေကိုကြိုမြင်နေတယ်..။ ဒီနေ့အတွက် ကျွန်မရှောင်ပုန်းဖို့ သင့်သေးသလား။ ဘာကိုပဲဖြစ်ဖြစ် ရင်ဆိုင်ချင်နေတဲ့ စိတ်တွေကစိုးတယ်… တစ်ခုခုသေချာနေခဲ့တယ်။
******

တက်လာတဲ့ခြေလှမ်းတိုင်းမှာ ယိုင်နဲ့ခြင်းတွေကိုအဖော်ပြုပြီးတော့… ဘယ်အချိန်ထဲက ပျောက်ဆုံးနေမှန်းမသိတော့တဲ့….. ယုံကြည်ခြင်းတွေကို ငတ်မွတ်လာတယ်…. ငါတော်တော်မောတတ်နေတယ် ကောင်မလေးရယ်။



လေတစ်ချက်တိုက်လိုက်တိုင်း.. မိုးစက်ကလေးတွေ လွင့်လွင့်လာတယ်။ နောက်တစ်ကြိမ်ကွေ့ပြီးရင်… ညာဘက်အခန်းပေါ့။ သူမ… ထွက်မသွားပါနဲ့တော့။ ငါ့အသက်နဲ့ထပ်တူလဲလှယ်ဖို့ မင်းဆီကိုရောက်လာခဲ့ပြီ…. အရိပ်ရယ်…. ဒီအကြိမ်တော့ အခွင့်အရေးပေးပါ….. ငါ့အလွမ်းတွေ…. ငါ့ကိုလောင်မြိုက်နေခဲ့တာ…. ဘယ်ဘက်ရင်အုံတစ်ခုလုံး.. ကျွမ်းနေပြီ။



အကြောင်းတွေ အကျိုးတွေ ခွဲခြားပြီးမှ အဖြေတစ်ခုရမယ်ဆိုရင် ဘာကိုမှမလိုချင်တော့တာ အမှန်ပါ… မင်းနှုတ်ခမ်းတွေ

ဟိုး…အရင်တစ်ချိန်က ဘာကိုမှနားမလည်ခဲ့တဲ့ ကောင်မလေးတစ်ယောက်ကို ပြန်လိုချင်တယ်… ဖြစ်နိုင်ခဲ့ရင်ပေါ့။

ဒီနေ့ သူမကိုတွေ့ရမှဖြစ်မယ်။



တိုက်နံပါတ် (၁၀၇) အခန်းနံပါတ် (၁၃)



ငါ့မှာ တံခါး ၃ ချက်လောက်ခေါက်ဖို့ အားတွေလိုနေသလား။ အရိပ်.. မင်း.. ဒီတစ်ကြိမ်တော့စွမ်းဆောင်ပေးစမ်းပါ… အရိပ်ကိုဖမ်းဖို့ အရိပ်လိုနေတယ်..



အပိုင်း(၁)



လှေကားတစ်ထစ်ချင်းဆီကို စည်းချက်မှန်မှန်တက်နေတဲ့ ခြေသံတစ်စုံပါ။ တိုးလည်းမတိုး ကျယ်လဲမကျယ်.. ဒီလိုခြေသံရဲ့ ပိုင်ရှင်က သူကလွဲပြီးဘယ်သူဖြစ်ဦးမှာလဲ။ သူက လှေကားတက်ရင်တောင် တစ်ထစ်ချင်းတက်တာကိုပဲ သဘောကျသူ။ ကိုယ့်ခြေသံ ကိုယ်ကြားပြီးမှ နောက်တစ်ထစ်တက်တယ်ဆိုတဲ့သူ။



တံခါးကိုခပ်ဖြေးဖြေးပဲ ခေါက်နေတာပါ…သုံးချက်.. ဒါပေမယ့် နားထဲမှာ ကျယ်လောင်လွန်းနေတယ်….

ဘုရား ဘုရား……

မသိစိတ်ဆိုတာတွေက အတိအကျသိနေတတ်တယ်ဆိုတာ မယုံမရှိပါနဲ့….

အနှစ်နှစ်ဆယ်လောက် ဝေးကွာနေရင်တောင် ဒီခြေလှမ်းတွေကို ကျွန်မမေ့နိုင်မှာမဟုတ်ဘူး…..

တစ်ခုခုထူးဆန်းနေတယ်ဆိုတာ ထူးခြားမှုဖြစ်စဉ်တွေရဲ့ အစတစ်ခုဖြစ်နိုင်လောက်ရဲ့…. ဒါဟာ အိမ်မက်တစ်ခုမဟုတ်လောက်ဘူးနော်…



မျှော်လင့်ချက်ဆိုတာ မထားတော့ဘူးဆုံးဖြတ်ပြီးမှ… ဒီတစ်ကြိမ်ဆိုတဲ့စကားတစ်လုံးကို အမိအရဆွဲပြီး…. စိတ်က အလိုလိုရင်ခုန်မိပြီးသား ဖြစ်နေပြန်တယ်။ ကျွန်မနားတွေကို မစွင့်ချင်တော့ပါ။

ခြေသံကတော့ အလိုလိုငြိမ်လျက်သားဖြစ်နေတယ်။

ဒါဟာ…. သူ ကျွန်မ အခန်းရှေ့ရောက်နေပြီဆိုတဲ့ အဓိပါယ်လား…. ကျွန်မခေါင်းကိုခါရမ်းလိုက်တယ်… မဟုတ်လောက်ပါဘူးဆိုတဲ့ အသိတစ်ခုထည့်ဖို့ အလိုလိုသတိပေးပြီးသားဖြစ်နေတယ်။

သူဟာ….သူဟာ…… သိပ်မာနကြီးတတ်တဲ့ယောက်ျားတစ်ယောက်မဟုတ်လား……

ဒါဆို … ကျွန်မကကော…..



ဒေါက်…ဒေါက်…ဒေါက်…

တံခါးမြည်သံတစ်ခုကို ကြားနေလျက်နဲ့…. အမှန်တကယ်လား…. စိတ်ကူးယဉ်မှုလား…. ပြန်တွေးနေရလောက်အောင် ကျွန်မမညံ့ဖျင်းမှန်းအလိုလိုသိနေတယ်…. လူကရွေ့လို့မရ…. သူ့ကိုတွေ့ခဲ့ရင်…..

ခြေထောက်တွေက အလိုလို ကုပ်လျက်သားဖြစ်နေတယ်… ကျွန်မနဲနဲကြိုးစားပြီး ရွေ့လိုက်တယ်…..



ကျွန်မဘယ်လိုပုံစံမျိုးနဲ့ နှုတ်ဆက်ရမလဲ…. ၀မ်းသာအားရကြိုဆိုရအောင် ကျွန်မ၀မ်းသာနေတာလား…. ဒါမှမဟုတ်…. နေနိုင်လိုက်တာဆိုတဲ့စကားတစ်ခွန်းနဲ့…… သူ့ကိုအားရပါးရ ရိုက်နှက်ပစ်ရမလား…. တကယ်ကော… ကျွန်မ.. သူ့ကိုရိုက်ချင်နေခဲ့တာလား…..



တံခါးခေါက်သံက ဒုတိယအကြိမ်ထွက်ပေါ်လာသည်…. ကျွန်မတွေဝေနေလို့မရတော့ဘူးနော်… သူက လိုတာထက်ပိုပြီး စိတ်ရှည်တတ်သူမဟုတ်ဘူး… ကျွန်မနဲ့ပတ်သက်ခဲ့ရင်ပေါ့လေ….. အခြားနေရာတွေမှာတော့ သူက သိပ်စိတ်ရှည်တတ်သူတစ်ယောက်အဖြစ် ကျွန်မစသိခဲ့တာပါပဲ.. ခြေလှမ်းတွေကိုတစ်လှမ်းခြင်း လှမ်းထွက်လာခဲ့သည်…. ကျွန်မစိတ်အစုံသည် လှုပ်ရှားရလွန်းလို့…..



တံခါးချပ်ကို ဖျပ်ခနဲဖွင့်လိုက်သည်….



အပိုင်း(၂)



အို….. ကျွန်မ ယောင်ရမ်းပြီး နှုတ်ခမ်းအစုံကို ပိတ်လိုက်သည်။

လူသည်… အလိုလို…. အရှေ့ကိုတိုးပြေးလိုက်သည်။ သူဒီလောက်ပိန်လှီနေဖို့ မကောင်းဘူး….။ ဘာတွေဖြစ်ခဲ့သလဲ…. သူလည်း ကျွန်မကို……….



ရည်ရွယ်ထားသောအရာများသည်…. ရည်ရွယ်ထားသည့်အတိုင်း…. ဘယ်တော့မှမဖြစ်တတ်ပါ။



မောင်…..

သူ့ကိုယ်ခန္ဓာတစ်ခုလုံးသည် ကျွန်မအပေါ်သို့ ပြိုလဲကျလာသည်….

မောင်…. ကျွန်မဒုတိယအကြိမ်ခေါ်လိုက်သည်။

မောင်သည်…. ဘာမှမပြောပဲ…. ဆွံ့အစွာ ငြိမ်သက်စွာ ကျွန်မကိုကြည့်နေသည်ဟု ခံစားနေရသည်။

ကျွန်မ အကြိမ်ကြိမ်ကိုင်လှုပ်လိုက်သည်။ နှုတ်ခမ်းမှလည်း ကယောင်ကတမ်းရေရွတ်နေမိသည်။

မောင်…. မောင်… ဘာမှမဖြစ်ဘူးနော်။ ဘာမှမဖြစ်ပါနဲ့မောင်ရယ်…. ကျွန်မယောင်နစွာဖြင့် မောင့်ခန္ဓာကိုယ်ကို စမ်းနေမိသည်။ မဟုတ်ဘူး… ဒီလိုပုံစံမျိုးနဲ့ မောင့်ကိုပြန်တွေ့ရမယ်လို့ ကျွန်မ တစ်ခါမှမတွေးခဲ့မိဘူး။

မောင်က မိန်းမတစ်ယောက်ကြောင့်နဲ့တော့….

မောင်!!!



အကြိမ်ကြိမ်တင်ပေးခဲ့ပြီးတဲ့…. ရေပတ်အ၀တ်လေးကို…. နောက်တစ်ကြိမ်ထပ်တင်ခဲ့တယ်။ သတိမေ့နေတဲ့ မျက်နှာလေးက အရမ်းဖြူစင်မှန်းသိပေမယ့်.. အရောင်တွေနဲ့ မျက်နှာတစ်ခုကိုပဲ မက်မောနေမိတယ်။ မောင်… ကျွန်မကိုအမှန်တကယ်ချစ်ခဲ့တယ်ပေါ့။ ယုံကြည်ပါလို့ပြောစရာမလိုအောင် သက်သေတွေက ပြည့်စုံနေတယ်။ ကျွန်မက အလွန်ညံ့ဖျင်းတဲ့ မိန်းမတစ်ယောက်ပါပဲ မောင်ရယ်။ သုံးစားလို့မရတဲ့ မာနတွေ.. အကောင်အထည်ပြစရာမရှိတဲ့ သံသယတွေနဲ့ မောင့်ကိုချည်နှောင်ခဲ့သူဟာ ကျွန်မပဲဖြစ်မှာပါ။

ကျွန်မကကော…. မောင့်ကို…။ မေ့လို့ရသူတစ်ယောက်လည်းမဟုတ်ခဲ့။ မုန်းဖို့စိတ်ကူးခဲ့သူလည်း မဟုတ်ခဲ့။ ဘယ်သူမှမထားနိုင်တဲ့ အချစ်တွေနဲ့ချစ်ခဲ့တယ်… အချစ်ဆိုတာအားလုံးကို မောင်နဲ့စတင်ပြီး မောင်နဲ့အဆုံးသတ်ခဲ့တဲ့ မိန်းမပါကွာ..။ ဒါနဲ့များ ကျွန်မဘယ်လိုစိတ်တွေနဲ့ မောင့်အနားက ထွက်ခဲ့နိုင်တာလည်း.. ဘယ်အရာတွေက တွန်းအားပေးခဲ့ပါသလဲ.. ဒီလောက်တောင် ခံနိုင်ရည်ရှိခဲ့တယ်တဲ့မောင်ရယ်..။ ခွင့်မလွှတ်ပါနဲ့။ လိုက်လည်းမရှာခဲ့ပါနဲ့လား။ ပစ်ထားလိုက်စမ်းပါ။ ဘယ်လောက်ထိမှမကြီးကျယ်တဲ့ မိန်းမတစ်ယောက်အတွက်နဲ့များ ..။



ခေါင်းမာခြင်း မဟုတ်မခံစိတ်ရှိခြင်း အရှုံးမပေးသည့်စိတ်ထားများသည်.. အချစ်ဆိုသည့်အရာကိုဖုံးကွယ်သွားနိုင်သည့် အခိုင်လုံးဆုံးအကြောင်းပြချက်များ ဖြစ်သည်ဟု ကျွန်မပြောခဲ့လျှင် လူအားလုံးက တပြိုင်နက်ခေါင်းငြိမ့်ကြလိမ့်မည်ဟု ကျွန်မမထင်ပါ..။



တစ်ယောက်ကိုတစ်ယောက် အပျောက်မခံနိုင်လောက်အောင်ချစ်ခဲ့ကြသည်… စေ့စေ့ကြည့်တာတောင် မကြိုက်ဘူးကွာဆိုသည့် မောင့်စကားသံကို ကျွန်မအလိုလိုကြားမိတယ်….. နှုတ်ခမ်းတွေက တိုင်ပင်စရာမလိုပဲ ပြုံးနေမိတယ်…

ယောက်ျားတစ်ယောက်အတွက် ကိုယ့်စိတ်တွေကို ဘယ်တော့မှ အသေးသိမ်မခံဖူးဆိုသည့် မိန်းမတစ်ယောက်သည် သူနဲ့ပတ်သက်လာရင် ကျွန်မမဟုတ်သည့် အခြားမိန်းမတစ်ယောက်၏ အမည်ကိုပင်မကြားနိုင်လောက်အောင် သိမ်ဖျင်းခဲ့သူဖြစ်သည်။



မခွဲမခွာနိုင်စွာချစ်နိုင်ကြသည်ဟု ခေါင်းစဉ်တပ်လို့ရနိုင်လောက်သည်။ လက်ချင်းခိုင်ခိုင်တွဲထားရက်နဲ့ ဘာကြောင့်ကျွန်မတို့ ဝေးကွာ ခဲ့ရသလဲဟု ပြန်မတွေးလောက်အောင်ပင် ကျွန်မခေါင်းမာခဲ့သည်။ ကျွန်မမနှစ်သက်ဘူးဟု တဖွဖွပြော၍ ကျွန်မ အနှစ်သက်ဆုံးသော အရာတစ်ခုမှာ မောင်သည် ရင်ထဲမှာတမြေ့မြေ့ နာကျင်အောင်ပြောတတ်၍ နှစ်သက်ပျော်မွေ့ သွားလောက်အောင် ချော့တတ်သည့် ယောက်ျားတစ်ယောက်ဖြစ်နေသည့် အကြောင်းပင်ဖြစ်သည်။ ထိုအချက်ကြောင့်ပင် ကျွန်မသူ့ကိုချစ်ခဲ့ကြပြီး ထိုအချက်ကြောင့်ပင် ကျွန်မသူ့ကိုထားခဲ့ခြင်းဖြစ်သည်။ ကျွန်မကတော့ သူ့ကိုဘယ်လောက်ပဲ စိတ်ဆိုးအောင်လုပ်ထားထား….ခေါင်းမာစွာပင် ပြန်မချော့တတ်သူဖြစ်သည်။ ထို့ကြောင့်ကျွန်မတို့ ဝေးခဲ့ကြလေသည်။ ကျွန်မဘ၀တွင် သူမဟုတ်သည့် အခြားယောက်ျား တစ်ယောက်သည်…. အသက်ရှင်နေသရွေ့… ဘယ်တော့မှရှိမလာနိုင်မှာ အထပ်ထပ်သေချာနေခဲ့လျက် ကျွန်မသူ့အနားမှ ထွက်ပြေးခဲ့လေ၏။



အသံတစ်ခု တိုးညင်းစွာကြားနေရသည်။ ကျွန်မ မောင့်နှင့်နီးနိုင်သမျှအနီးဆုံးဖြစ်အောင် တိုးသွားလိုက်သည်။



အရိပ်… ရေ..ရေ



ကျွန်မသည်…. ချစ်သူနှုတ်ခမ်းမှ ပထမဆုံးကြားရသည့် စကားများကိုဆွံ့အစွာ….ကြည့်နေမိသည်…. သတိတစ်ခုဝင်လာသည်… ကျွန်မအမည်လား.. နားထဲမှာတော့ ရေလို့ကြားနေသလိုလို… ဟုတ်တယ်… မောင်…ရေငတ်နေမှာပေါ့…



ကျွန်မ ဂွမ်းစလေးဖြင့် မောင့်နှုတ်ခမ်းကို အသာအယာတို့ထိမိသည်…. တစ်စက်ချင်းကျလာသော….ရေစက်ကလေးများကြောင့် မောင့်နှုတ်ခမ်းလေးကအနည်းငယ် စိုပြည်လာသလိုခံစားရသည်။



မောင်…



ကျွန်မ မောင့်အနားသို့ကပ်၍ အသာအယာခေါ်လိုက်သည်….



မျက်တောင်လေးများသည်… ပုတ်ခတ်ပုတ်ခတ်ဖြစ်လာသည်….. ဖြည်းဖြည်းချင်းပွင့်လာသောမျက်လုံးလေးများကို ကျွန်မစိတ်ဝင်တစားကြည့်မိသည်…. ကျွန်မမောင့်ကို ဒီလောက်အသေးစိတ်တစ်ခါမှမကြည့်ခဲ့ဖူးတာ သတိရမိသွားသည်… ကျွန်မ မောင့်လက်ကို အသာအယာလေးကိုင်ထားလိုက်သည်….



အပိုင်း(၃)



မောင်သည်… ကျွန်မကိုရီဝေစွာကြည့်နေသည်…. ထို့နောက် သူမျက်နှာသည် နီမြန်းလာသည်…. မကြာလိုက်ပါ….

ကျွန်မတစ်ခါမှမတွေ့ခဲ့ဖူးပါ….. မောင်သည်…. ဘယ်လိုအချိန်မျိုးမှာဖြစ်ဖြစ် တိကျသေသပ်သောနှုတ်ခမ်းများ တင်းစေ့စွာဖြင့် အရာရာကို ချယ်လှယ်သွားနိုင်ခဲ့သော…. သူလိုချင်သည့်အရာကို မျက်လုံးအကြည့်တစ်ချက်ဖြင့်ပင်ရယူနိုင်လောက်အောင် ကိုယ့်ကိုကိုယ်ယုံကြည်နေခဲ့သူဖြစ်သည်…. အခုတော့… ကျွန်မမျက်စိရှေ့တွင် မျက်ရည်ဝဲနေသော…. ဆုံးရှုံးမှုများကြောင့် နာကျင်စုတ်ပြတ်သတ်နေသော… ယောက်ျားတစ်ယောက်ဖြစ်နေသည်။ ကျွန်မလက်ပေါ်သို့ မျက်ရည်စက်များကျလာသည်…

ကျွန်မ အလန့်တကြားဖြင့် ကိုယ့်မျက်နှာကိုယ်စမ်းလိုက်မိသည်…. ကျွန်မကော… ကျွန်မလည်းမျက်ရည်ကျနေတယ်… ဘာကြောင့်လဲ…. မောင့်ရဲ့နာကျင်မှုတွေကို ကျွန်မ မခံစားနိုင်တဲ့အတွက်ကြောင့်လား…. ကျွန်မကိုယ်တိုင်နာကျင်နေသူတစ်ယောက်ဖြစ်နေခဲ့တာလား….



မင်း..နေ…နိုင်..လိုက်..တာ..ကွာ…..



ဒါပထမဆုံးပြောတဲ့ စကားတစ်ခွန်းပေါ့…..



တစ်ဖက်သို့စောင်းကျသွားသော… သူ့မျက်နှာကို ကျွန်မလက်အစုံဖြင့် ပြန်ဆွဲယူလိုက်သည်…. သူသည်… ကလေးတစ်ယောက်လိုပင် ပေကတ်နေခဲ့သည်…. ကျွန်မနောက်တစ်ကြိမ် သူ့မျက်နှာကို ပြန်လှည့်လိုက်သည်။ ကျွန်မလက်တွေကို တွန်းဖယ်ပစ်လိုက်ဖို့ထိ သူအားမရှိခဲ့ဘူးထင်ပါသည်။



ကျွန်မ သူ့ လက်အစုံကို ဆွဲယူလိုက်သည်။

ကျွန်မမှာ အပစ်ရှိပါတယ်မောင်ရယ်။ ဘာပဲဖြစ်ဖြစ် မောင့်ကိုတစ်စက္ကန့်မှ မမေ့ခဲ့ဘူးဆိုတာ ယုံပါ။ ဒီလောက်ထိ မရည်ရွယ်ခဲ့ဘူး။ မောင် ကျွန်မကို တစ်ခုခုအပစ်ပေးလိုက်ပါ။ ကျွန်မ ကိုယ့်ကိုကိုယ်ခွင့်မလွှတ်နိုင်လောက်အောင် ဖြစ်နေတယ်။ မောင်ခွင့်မလွှတ်ပါနဲ့။ ကျွန်မကို ခွင့်မလွှတ်မှုတွေနဲ့ ထားခဲ့လိုက်ပါ။



အရာအားလုံးက မထင်မှတ်ခဲ့တာတွေပါပဲ။ အတ္တကြီးတဲ့ မိန်းမတစ်ယောက်ဟာ မောင့်ချစ်သူဖြစ်မလာသင့်ပါဘူး။ မောင်ကိုကျွန်မချစ်တဲ့ အချစ်တွေထက်ကိုပိုပြီး မောင့်ဆီကအချစ်တွေကို လိုချင်လာတယ်။ ကျွန်မဆီရောက်လာမယ်ဆိုတာကို …. ကျွန်မမျှော်လင့်ရင်းနဲ့ သေဆုံးသွားချင်တဲ့ထိ ရူးမိုက်ခဲ့တယ်မောင်။ ရူးကြောင်ကြောင် အတွေးတွေနဲ့ ချစ်သူကိုစွန့်ပစ်ခဲ့တဲ့သူပါ။ ကိုယ့်ကိုကိုယ်သတ်မယ့် မာနတွေက မောင့်ကိုဒီလောက်ထိခံစားခဲ့ရမယ်လို့ ကျွန်မမတွေးမိလောက်အောင် မှောင်မည်းခဲ့သူပါ။



အရိပ်ကို.. ကို.. သိပ်.. ချစ်တယ်။



ဒီအချိန်ထိ ဒီစကားကို ပြုံးပြီးပြောနေသေးရလား မောင်ရယ်။ ကျွန်မခွင့်မလွှတ်ဖို့ပဲ တောင်းဆိုထားတာပါ။



အပိုင်း(၄)



မောင် ကျွန်မကိုပြုံးကြည့်နေတာ တော်တော်ကြာနေပြီဖြစ်သည်။

ကျွန်မ…. စကားတွေအများကြီးပြောနေခဲ့သည်။ ကျွန်မတို့ အရင်လိုပြန်ချစ်မယ့်အကြောင်းတွေပါသည်။ မောင့်ကို ကလေးဆန်ဆန် မထားခဲ့တော့ဘူးဆိုသည့် အကြောင်းတွေပါသည်။ မောင် ကျွန်မ ကိုလွမ်းလို့ဖြစ်တဲ့ အချစ်ဖျားရောဂါကို ကုမည်ဆိုသည့် အကြောင်းတွေပါသည်။ မောင်နေကောင်းရင် ကျွန်မတို့ အိမ်ကလေးမှာ ပြန်နေကြမည်ဆိုသည့် အကြောင်းတွေပါသည်။ မောင်ကြိူက်တဲ့ အစားတစ်ခုခုလုပ်ပေးမယ်ဆိုသည့် စကားနှင့် အဆုံးသတ်လိုက်သည်။



မောင်ပြုံးနေသည်။

မောင်။ မေးနေတယ်လေ။ တစ်ခုခုစားလိုက်မှဖြစ်မယ် မောင်ရဲ့။ မောင် သိပ်အားနည်းနေတယ်လေ..နော်။

ကျွန်မ မောင့်ခြေထောက်လေးတွေကို သတိလက်လွတ် စမ်းကြည့်လိုက်သည်။

အို… အေးစက်နေလိုက်တာ….

မောင်…. ကျွန်မ မောင့်မျက်နှာကို အလန့်တကြားကိုင်လိုက်သည်….

မောင်.. မဟုတ်ဘူးနော်။

မောင်.. မောင် .. မောင်

မောင်… ဘာကိ်ုပြုံးနေခဲ့တာလည်း။

နင် ငါ့လိုပဲခံစားပြီး ကျန်ခဲ့ဆိုပြီး ကျိန်စာတွေနဲ့ထားခဲ့တာလား….. ဘာအဓိပါယ်နဲ့လဲ…မောင်ရယ်… ကျွန်မတို့အခု နားလည်မှုတွေနဲ့ တည်ဆောက်ဖို့ ကတိတွေပေးခဲ့ကြပြီးပြီလေ။

မာနတွေကို သဂြိုဟ်ပစ်ဖို့ အားလုံးဆုံးဖြတ်ပြီင်္းပြီလေ….

မောင်။ ကျွန်မကိုမထားခဲ့ပါနဲ့မောင်ရယ်။

မောင်….



ဆရာဝန်ကို အလောတကြီး ခေါ်လိုက်သည်။ ကျွန်မခြေထောက်တွေ ဂနာမငြိမ်ပါ။ ကျွန်မ မောင့်ကုတင်နားထောင် အခေါက်ပေါင်းများစွာ လျှောက်လှမ်းခဲ့ပြီး ဖြစ်ကောင်းဖြစ်လိမ့်မယ်။ တောင်ရောက်မြောက်ရောက် ဘုရားစာတွေကိ်ု သတိလက်လွတ်ဆိုနေမိသလား။ ကျွန်မမသိပါ။ ကျွန်မ မောင့်နားကိုသွားလိုက်သည်။

မောင်.. ဆရာဝန်လာတော့မယ်။ ခဏလေးစောင့်ပါမောင်ရယ်နော်။ ကျွန်မကို မောင် ဘယ်တော့မှမထားခဲ့ဘူးနော်။ မောင်က ကျွန်မကို အရမ်းချစ်တာလေ..။ မောင်..



သူအသက်မရှိတော့ပါဘူး..။



မဟုတ်ဘူးဆရာ။ သူ မသေပါဘူး။ ပြန်ကြည့်ပေးပါဦး ဆရာ။ မောင် ကျွန်မကိုဘယ်တော့မှ ထားခဲ့မှာ မဟုတ်ဘူး။ သူ ကျွန်မကို စမ်းသပ်တာနေမှာပါ။ သူက ကျွန်မကို ဒီလိုပဲနောက်နေကြပါ။



စိတ်ကို အေးအေးထားပါဗျာ။ လူဆိုတာ တစ်နေ့သေရမှာပါပဲ။ ကျွန်တော် လူနာကိုတော့ မသိပါဘူး။ ဒါပေမယ့် သူသေသွားခဲ့တာ ကြာပါပြီ။ လုပ်စရာရှိတာကို ဆက်လုပ်ကြတာပေါ့ဗျာ။ ကျွန်တော်ကို ပြန်ခွင့်ပြုပါ။



မောင်.. သေပြီတဲ့။

မောင်ဆီက ထွက်ပြေးလာတုန်းက ရင်ထဲမှာ မောင် က ကျွန်မအနားမှာ အမြဲရှိတယ်ဆိုတဲ့ ယုံကြည်ချက်လေးနဲ့ အသက်ရှင်လာတာလေ….

ကျွန်မအနားက မောင်က တကယ်ပြန်ထွက်သွားပြီပေါ့။ မောင့်နှလုံးခုန်သံတွေ ကျွန်မကြားနေရတယ်။ ကျွန်မတို့ ဘယ်တော့မှ မခွဲတော့ဘူးမောင်ရယ်နော်။ ကျွန်မ မောင့်ကို သိပ်ချစ်တယ်။



အရာအားလုံးသည်…. တိတ်ဆိတ်ငြိမ်သက်နေခဲ့သည်….. အခန်းလေးအတွင်းတွင်… မှောင်လာလိုက် လင်းလာလိုက်… လေပြေညင်းသည်…. တိတ်ဆိတ်စွာတိုက်ခတ်နေခဲ့သည်…..



ကုတင်ထက်တွင် ချိုသာစွာပြုံးလျက် လဲလျောင်းနေခဲ့သည့် ယောက်ျား တစ်ယောက်ရှိသည်။ သူ့နံဘေးတွင်….. အလားတူ အဓိပါယ်ဖော်ရခက်သော အပြုံးနှင့် မိန်းမတစ်ယောက်အိပ်စက်နေသည်။ သူမသည်….ထို ယောက်ျား၏ လက်ကို မလွှတ်တမ်းတင်းတင်းကျပ်ကျပ် ကိုင်ထားသည်…. သူမသည် နှလုံးခုန်သံတစ်ခုကို နားစွင့်နေသည့်အလား ရင်ဘတ်ပေါ်တွင် ခေါင်းလေးမှေးတင်၍ အိပ်စက်နေခဲ့သည်….. နာရီသံသည် ချောက်ချက်ချောက်ချက် မြည်နေသည်….. သံစဉ်မပါသော်လည်း သူတို့အိပ်ပျော်ကြသည်….. ဘယ်အချိန်ထိ အိပ်စက်နေကြမလဲ… ဘယ်သူမှမသိနိုင်ပါ…… ဘာအတွက်ကြောင့် အိပ်စက်နေကြသည်ကိုလည်း မည်သူမှမသိနိုင်ခဲ့။ သို့သော်… သူတို့သိပ်ချစ်ကြတာပဲဟု အားလုံးယုံကြည်သွားခဲ့သည်။



အရာအားလုံးကတော့ တိတ်ဆိတ်ငြိမ်သက်နေခဲ့သည်…………. သူတို့သိပ်ချစ်ခဲ့ကြသလား.. သူတို့ကိုယ်တိုင် မသိနိုင်တော့ပါ။